كيفاش نضمن انني ننجح فصناعة المحتوى او القرايا او الخدمة

كيفاش نضمن انني ننجح فصناعة المحتوى او القرايا او الخدمة ! هي ما كاين حتى حاجة مضمونة ب ١٠٠ ٪؜ فهاد الحياة غير باش نكونو مفاهمين ولكن كاين واحد الكلمة لي مهمة بزاااف و غاتعاونك بزاااف و غاتخليك مل مرة تحس بلي كاين تطور فداكشي لي باغي تنجح فيه و الكلمة هي la discipline او الانضباط نعطي مثال ب 3 حوايج انا شفت فيهوم النتيجة بفضل الانضباط فالقرايا ،فصناعة المحتوى و ففقدان الوزن غير هو الانضباط خاص يجي معاه شويا ديال اللامبالاة لواحد القضية، و لي هي الناس كيفاش غادي يشوفو داك الانضباط ديالك باش تفهمني غادي نعطيك مثال فاش كتكون منضابط فقرايتك ! الناس: مالك على حالتك رخف على راسك شويا لي يشوفك هاكا يقول غادي تخدم مع لاناسا منضابط فصناعة المحتوى (فالحالة ديالي) ! الناس مالك كتحط كل نهار واش ما كاتعياش؟ منضابط فالرياضة! الناس: لي يشوف ك هاكا يقول باغي تولي تغلب الديناصور!! بكل بساطة ما غاتبقاش تشوف الامور من نفس الزاوية نتا و هوما - بصفة عامة كاملين كنتحاربو يومين من اجل فهاد الحياة ! الحرب فيك فيك ! غير هو خاصك تختار المعركة ديالك و تختار جهدك فين بغبتيه يمشي! ما فيا ما نعاود نقرى و نصحح هادشي لي كتبت ! الى كان شي غلط ديرو عين ميكة المهم غا جاتني على الگانة نكتب هاد التخربيق! انا غادي نوض نقاد البقلاوة ! حيتاش ديال الدار حسن من ديال الزنقة! (والله ما عرفت اش دخل هادشي فالموضوع😂)